No je plasude a Confartigianato Fvg la decision dal Guvier di blocâ i incentîfs dal Superbonus, i sconts in fature e la cession dal credit di impueste sul bonus. Il so president, Graziano Tilatti, al à doprât peraulis une vore duris tant di definî il proviodiment isteric: “No si capìs la reson di une decision dal gjenar. No si pues zuiâ cu la vite di un compart, chel edîl, ma ancje di lavoradôrs e fameis, in mût cussì isteric e irazionâl. Se l’obietîf al fos distruzi un setôr, a podaressin rivà a fâlu pardabon”.
Il president di Confartigianato Fvg al cjale al compart edîl dal Friûl-Vignesie Julie – 1.111 aziendis e plui di 4 mil dipendents – e si esprim cussì: “Nol è pussibil cambiâ lis regulis in corse. A son aziendis che a àn invistît dal lôr capitâl par vierzi i cantîrs e cumò si cjataran cence licuiditât cul pericul reâl di sierade. A dut chest si zontin i dams che une decision compagne e compuartarà sui lavoradôrs dal setôr e su lis fameis che a àn viert un cantîr cul Superbonus e no lu àn concludût ancjemò. Nol è vêr, di fat, che lis fameis no invistissin dal propri par podê meti in vore i lavôrs”. Ai 31 di Zenâr in regjon a jerin 286 milions di credits a pericul. (A.D.G.) -17.02.2023
