De Regjon 119 milions par agriculture e mont

Lis risorsis complessivis stanziadis intal belanç regjonâl pal 2024 a pro dal setôr agroalimentâr, itic, des forestis e de mont a rivin a plui di 119 milions di euros. “Cheste leç di stabilitât e conten misuris di prospetive une vore impuartantis: tra chestis, l’incentîf ae costituzion di une sole comunitât energjetiche regjonâl agricule che e disfrute la deroghe previodude de normative nazionâl pe agriculture, che e permet di no jessi vincolâts al atac a une cabie primarie. Di fat duncje o podarìn costituî une vere e proprie rêt di ducj i operadôrs regjonâi” al à comentât l’assessôr regjonâl aes Risorsis agroalimentârs, forestâls e itichis Stefano Zannier ilustrant in aule i contignûts di sô competence de leç di Stabilitât. Il stes Zannier al è jentrât dopo intal detai di ciertis misuris principâls metudis in at: “a poie des impresis agriculis e agroalimentârs a son 19 milions di euros pal Fonts di rotazion in agriculture; in continuitât cui intervents dal 2023, a son previodûts 5 milions par fâ cori lis graduatoriis dai contribûts pai implants fotovoltaics des aziendis agriculis e si atestin a 12 milions lis risorsis destinadis a oparis di irigazion e manutenzions realizadis dai consorzis di bonifiche. Al Ersa a van 4 milions di euros pe promozion dal agroalimentâr, 2 milions di euros i aiûts pai servizis di consulence aes aziendis zootecnichis e 1,5 milion pal Fonts emergjencis in agriculture”. (a.d.g.) – 14.12.2023