A saran 60 lis assunzions intai doi negozis che a vierzaran sabide ai 16 di Novembar a S. Vît dal Tiliment. Si trate dai gnûfs Superstore e Pet Store (cuasi 3.400 metris cuadris) che si cjatin dentri de zone comerciâl dei Ronchi in vie Udine, che cumò si pues rivâ cun plui facilitât daspò dai lavôrs su la viabilitât, indulà che a son stadis fatis dôs rotatoriis.
A saran il sindic di S. Vît Alberto Bernava e l’aministradôr delegât di Cia-Conad, Luca Panzavolta, a taiâ il nastri dal supermarcjât di gnove concezion e dal negozi pes bestiis che si cjate li dongje. Il personâl des dôs buteghis al è in dut di 80 personis, di chestis trê cuarts a saran gnovis assunzions. La gjestion e je stade dade ai imprenditôrs locâi Antonio Facca, Paolo Moretto, Stephen Odorico e Paolo Dal Bo, che a gjestissin za il supermarcjât de Conad di vie Oberdan, simpri a S. Vît dal Tiliment.
Dentri dal supermarcjât, che al è grant 3 mil metris cuadris, si podaran cjatâ cetancj prodots ancje dal teritori, come chei di “Siamo Friuli Venezia Giulia”, intant che tal negozi pes bestiis grant 360 metris cuadris si cjataran prodots pe alimentazion e pe cure di dutis lis besteutis che nus tegnin compagnie. (a.d.g.) – 14.11.2024
