Firmât vuê a Udin l’at di fusion tra BancaTer e Friuliovest Banca che al da cussì vite al istitût di credit plui difondût in regjon e ae bancje plui grande di credit cooperatîf dal Friûl-Vignesie Julie. Bancje 360 Fvg, chest il non che al deventarà operatîf dal prin di Lui, e je presinte in dutis lis provinciis de regjon cun 59 bancs, che a cuvierzin cussì il 90% de popolazion residente. I dipendents a son 400 al servizi di 20 mil socis e 100 mil clients. La masse aministrade e je di 5,8 miliarts. La sotscrizion devant dal nodâr Andrea Maistrello e je stade fate dai rispetîfs presidents Luca Occhialini e Lino Mian, che a àn definît la firme un “avigniment storic”, ven a stâi chel di dâ vite a une realtât des dimensions suficientis par frontâ il marcjât, ma che e reste purpûr une bancje di prossimitât.
I acuardis a previodin che la presidence de gnove bancje e tocji a BancaTer e la vicepresidence a Friulovest Banca, incarghis che a saran uficializâts intal prin consei di aministrazion. La sede legâl e la direzion centrâl e sarà a Pordenon, dulà che Friulovest Banca e veve definît la sô sede diviers agns indaûr. Lis dôs rêts comerciâls a son tra di lôr complementârs e a van, apont, di Sacîl a Triest. Uniche soreposizion a Codroip, dulà che e restarà dome che une portele. (A.D.G.) – 22.06.2023
