Esportazions stabilis tal 2024 pal Friûl-Vignesie Julie, ma dome in graciis dai bogns risultâts fats segnâ de cantieristiche navâl.
Tal an passât, su la fonde de analisi dai dâts pandûts dal Istat, fate dal ricercjadôr de Ires Fvg Alessandro Russo, il valôr des venditis tal forest (19 miliarts di euros) al è restât chel dal an prime, cuntun plui 0,2% a pet dal 2023. A nivel talian la variazion e je stade negative (mancul 0,4%).
Tal Nordest chei piês a son stâts Venit e Emilie-Romagne, che tal ordin a àn fat segnâ un mancul 1,8 e mancul 2%, intant che il Trentin–Sudtirôl al à vût un plui 1,9%.
La aree dal Lusinç cuntun plui 24% e Juliane (plui 5,7%) a son chês che a àn fat segnâ i risultâts miôr. E je lade piês par Udin, che e à segnât un mancul 7,8% par un câl di 600 milions di euros, soredut par cause dal sbassament des esportazions di prodots siderurgjics, e a Pordenon, che al à regjistrât un câl dal 1%. (a.d.g.) – 11.03.2025
