Il Friûl-Vignesie Julie, intun trieni complès dal sigûr e plen di sfidis, al à rivât a cressi, a espuartâ – plui dal rest de Italie – ribatint la sô posizion favoride e strategjiche al centri de Europe.
Udin e ponte a deventâ ancje il centri dal dibatiment e de riflession sui grancj temis gjeoeconomics e gjeopolitics, cul gnûf forum “Open Dialogues for Future”, che al à cjapât inviament vuê a buinore, cu la ideazion e la organizazion de Cjamare di Cumierç Pordenone-Udine, la colaborazion di The European House – Ambrosetti e la direzion sientifiche dal gjornalist e sagjist Federico Rampini, che, intune cul president Giovanni Da Pozzo, al à viert i lavôrs intune Sale Valduga sold out – cussì tant che chês altris salis de sede de Cjamare di Udin, colegadis in videoconference.
“La nestre Cciaa – al à dit Da Pozzo – e à scomençât a fevelâ di futûr intal 2010, cuant che nol jere cussì abituâl. Cun chest gnûf forum o continuìn a fâlu, cuntun tai che al valorize plui il rûl di Udin e dal Friûl, un rûl di sburt dimostrât ancje cuntun disvilup economic e cuntun trafic in esportazion cressût dal 51,3% tra tierç trimestri 2021 e il stes periodi dal 2022 e che al ponte a afermâ cheste sô posizion favoride ancje intal ambit de riflession sui senaris futûrs”.
