La assemblee de Acri (Associazione di Fondazioni e di Casse di Risparmio Spa) e à confermât inte cjarie di vice president cun deleghe aes Relazions istituzionâls Giuseppe Morandini, president de Fondazione Friuli. Ae vuide de Associazion, elet par aclamazion, Giovanni Azzone, che al cjape il puest di Francesco Profumo pal completament dal mandât dal trieni 2022-2024.
Costituide intal 1912, Acri e je la organizazion che e rapresente in maniere coletive lis Fondazions di origjin bancjarie e lis Cassis di Sparagn Spa. No à fins di vuadagn, e je apolitiche e e je dreçade a tutelâ i interès des associadis par favorî l’otigniment dai fins istituzionâi, coordenâ la lôr azion, promovi la realizazion di progjets comuns. E je componude di 108 socis: 84 Fondazions di origjin bancjarie, 11 Societâts bancjariis, 8 Associazions teritoriâls di Fondazions, 2 altris societâts e altris 3 Fondazions. (a.d.g.) – 23.02.2024
