I artesans a judin i zovins cui mistîrs dal teatri

Tancj artesans a fasin i conts simpri plui cu lis dificoltâts di un mudament di gjenerazion e ancje i mistîrs dal mont dal teatri a son a risi di sparî. Simpri plui produzions pal teatri, par esempli, a fasin di mancul di cualchi professionalitât par taiâ lis spesis. Propit par chest, il Teatro Club di Udin al inmanee di trê agns incà, cu la poie di Confartigianato, “Mestieri della scena”, mistîrs de sene, une iniziative par tornâ a meti in contat i vuardians di un antîc savê manuâl, i artesans, cun cui che al varès di lâ su’ sul palc, fasint cussì cjatâ il mont de produzion e chel de creazion artistiche. Tacât a Udin e rivât fint a Gurize, il progjet al à un gnûf diretôr artistic, il regjist Paolo Nikli, che al darà ai zovins sot dai 35 agns la pussibilitât di fâ un viaç tal mont dal teatri in ducj i components, ufrint un percors di esperience e cognossince artistiche e tecniche, teoriche e pratiche. Ogni grup al sarà in vore cui mestris che a contaran la lôr esperience, la teorie e la pratiche. E ai 20 di Novembar tal teatri “S. Giorgio” di Udin, a mostraran ancje al public la machine che e lavore a cidin daûr des cuintis. (A.I.) – 15.09.2024