Il cafè tra i ‘bens de Unesco’: Triest e spiete il 2024

La candidature dal cafè tant che ‘ben protet’ de Unesco al va indenant. La associazion Museo del Caffè di Triest e il Circul Unesco di Udin a àn inmaneât un incuintri che al è lat propit ben, cu la partecipazion di cualchi produtôr triestin di cafè, par ilustrâ lis resons e lis strategjiis de candidature ae Unesco dal “Rituâl dal Cafè Esprès talian tant che patrimoni imateriâl de umanitât” . La gnove plui impuartante e je che la Unesco e à decidût di disdopleâ i propris “ricognossiments”, cuntune division in “materiâi” e “imateriâi”, premiant a agns alternâts l’un e chel altri. La candidature dal cafè, che e viôt Triest in prime file, no vignarà valutade ae fin di chest mês come che si crodeve, ma inte Vierte dal 2024. A coventin duncje une azion comune e la massime poie istituzionâl. (A.I.) – 09.03.2023