Promovi un gnûf model di insediament, che al passe traviers lis impresis tecnologjichis e di servizis, inte cussience che la competitivitât dai teritoris e dipent ancje de capacitât des sôs realtâts produtivis di acelerâ sul front de inovazion.
Al è chest un dai obietîfs principâi dal program strategjic di Carnia Industrial Park di Damâr, che la sô assemblee dai socis e à aprovât, ae unanimitât, il belanç 2022. L’atîf patrimoniâl al passe i 100 milions di euros, cun 87 milions di patrimoni imobiliâr e un patrimoni net di plui di 33,5 milions.
Il valôr de produzion regjistrât intal 2022 al è di 8,6 milions di euros, cun rigjâfs di fits superiôrs a 3,3 milions euro (+45% intal cuincueni) e un util prime des impuestis di 425 mil euros. Significatîf il valôr dai paiaments fats viers dai furnidôrs: plui di 23 milions, cuintri i 13 dal 2021. Un dât che al testemonee la capacitât di gjenerâ un volan di risorsis sul teritori locâl e regjonâl.
Ai 31 di Dicembar dal 2022 a jerin 180 lis aziendis presintis intes areis industriâls dal Carnia Industrial Park, che si àn di zontâ siet gnûfs insediaments intal 2023. A lavorin 1.960 personis, a front dai 4.270 lavoradôrs complessîfs intes zonis industriâls di Damâr, Tumieç e Vile Santine. (A.D.G.) – 21.06.2023
