L’istitût tecnic superiôr Mits Academy gnovis tecnologjiis pal made in Italy al à passât i 300 iscrits e al ponte a dopleâ il numar dai iscrits. E je la sfide prossime che tra la fin dal 2024 e il principi dal 2025 al podarà contâ su la gnove sede in costruzion inte aree de ex Dormisch. Fondât intal 2010, i prins cors a son partîts intal 2011, cun 52 students. I prins 38 diplomâts a àn otignût il titul intal 2013. A distance di 10 agns, i tecnics superiôrs jessûts dal Mits a son 799.
Cumò lis ativitâts de Fondazion si fasin in 4 diviers sedis. La prospetive e je chê di dâ acet a ducj i corsiscj inte gnove sede di Udin, inte aree ex Dormisch. I lavôrs a son partîts intal 2022 e a saran completâts tra la fin dal 2024 e il principi dal 2025. Il gnûf complès al è stât progjetât par dâ acet a 600 students. (a.d.g.) – 05.10.23
