In cressite la fiducie des impresis regjonâls

La fiducie des impresis dal terziari dal Friûl-Vignesie Julie e va in miôr in maniere significative, tant che une imprese su trê e domande credit par invistiments. E a son positivis ancje lis sperancis des impresis in tiermins di fiducie intal andament de proprie ativitât. Il dât al ven dal Osservatori curât par Confcommercio Fvg di Format Research, che al à notât ancje il miorament dai rigjâfs des impresis regjonâls dal terziari, soredut in graciis de sburtade des impresis dal turisim e dai servizis. Di là dai rigjâfs, al va in miôr ancje l’andament dai presits dai furnidôrs aes impresis dal terziari F-Vj, e cuasi un tierç des impresis al domande credit par fâ invistiments, e no dome pai paiaments. Cuasi dôs aziendis su trê, dut câs, a àn decidût di cressi i presits ai propris clients par contrastâ l’aument dai coscj dai furnidôrs. (A.I.) – 13.03.2023