Intal prin trimestri dal 2023 il numar di lavoradôrs in Friûl-Vignesie Julie, stant al Istat, al è di 514.700, 1.600 in mancul a pet dal stes periodi dal an passât (-0,3%). “La flession rilevade – al osserve Alessandro Russo, ricercjadôr de Ires Fvg che al à rielaborât dâts Istat – si met intune fase di ralentament tendenziâl de ocupazion tacade inte ultime part dal 2022 (-0,5% intal tierç trimestri, -1,7% intal cuart), dopo une fuarte incressite regjistrade intal prin semestri”. Il sbassament intal prin trimestri 2023 al à rivuardât in maniere esclusive la componente masculine (-1,8% cuintri il +1,6% di chê feminine) e il lavôr indipendent (-4,2%, che al cjape dentri prin di dut imprenditôrs, libars professioniscj e autonoms), intant che e va indevant la cressite de ocupazion subordenade (+0,7%). I sbassaments regjistrâts intal ambit de industrie e dal grup che al cjape dentri cumierç, albiercs e ristorants a son stâts compensâts des variazions di segn opuest des costruzions e dai servizis.
Il tas di ocupazion regjonâl (calcolât inte fasse di etât cjapade dentri tra i 15 e i 64 agns) inte prime part di chest an si è atestât al 68,3% (73,7% pai masclis cuintri il 62,8% des feminis). Il tas di disocupazion al è dal 5% (3,8% pai oms e 6,3% pes feminis).
Intal prin trimestri dal 2023, al fâs ancje savê Russo, il valôr des venditis forestis des impresis dal Friûl-Vignesie Julie (di 4,5 miliarts di euros) al à mostrat un sensibil sbassament a pet dal stes periodi dal an passât (-9,9%, pâr a cuasi mieç miliart in mancul). (A.D.G.) – 13.06.2023
