Il president di Cafc, Salvatore Benigno, al à fat il belanç dai invistiments realizâts de societât di gjestion dal servizi idric integrât – che al servis 187mila utencis de ex provincie di Udin garantint il servizi a 572.975 abitants – intal an a pene concludût e i obietîfs principâi di rivâ intal 2023.
Intal 2022 Cafc al à invistît intai servizis di acuedot 8,312 milions di euros, intes fognaduris 9,560 milions e inte depurazion 6,796 milions par un totâl di 24 milions di euros.
I invistiments principâi realizâts intal 2022 a àn rivuardât la riduzion des pierditis idrichis e de interuzion dal servizi; il miorament des cundizions fisichis e il dimensionament des rêts fognariis; il miorament de eficience economiche e funzionâl de gjestion des infrastruturis di depurazion.
“Ancje pal 2023 – al conte Benigno – si previodin invistiments par plui o mancul 25 milions di euros, cul obietîf dal miorament continui dal servizi idric integrât. In particolâr si sin dâts l’obietîf di ridusi ancjemò lis pierditis idrichis, in graciis di une ativitât fuarte di invistiment e di digjitalizazion des infrastruturis; cressi la capacitât di depurazion des aghis refluis e il riûs des aghis depuradis, in sinergjie cun industrie e Consorzis di Bonifiche”.
“Di un pont di viste strategjic al è tant indenant il dialic cui socis Cafc e cun altris societâts di setôr, in viste de creazion di une multi-utility par aghe e scovacis inte ex provincie di Udin, cun benefics in tiermins di otimizazion dai coscj di gjestion, realizazion di economie di scjale, plui fuarce devant dai contescj di turbolence dai marcjâts, contigniment des tarifis pai citadins e impresis”. (A.D.G.) – 4.01.2023
