La becjarie Comand tra lis ativitâts storichis de regjon

La becjarie Comand di Mortean e je stade ricognossude “ativitât storiche dal Friûl-Vignesie Julie”. Lu à decidût la Zonte regjonâl cuntune delibare proponude dal assessôr regjonâl aes Ativitâts produtivis e turisim. Il ricognossiment, daûr de normative, al è rivât cu la segnalazion dal Comun di Mortean, dulà che la becjarie Comand e je vierte dal 1939. Si che duncje e à bielzà passât i sessante agns di ativitât previodûts de leç regjonâl par jentrâ a fâ part de liste. La becjarie, innomenade in dute la regjon pe cualitât des cjars e des lavorazions e ancje pe professionalitât dal personâl, e podarà jentrâ inte rêt dai locâi e des ativitâts storichis de ufierte turistiche regjonâl. (A.I.) – 20.02.2023