“La Fiere di Udin e je deventade un Campus”

“In chescj trê agns Gomiero al à puartât a tiermin la sô mission, ven a stâ trasformâ la Fiere di Udin in pardabon un Campus, destinât no dome a manifestazion espositivis, ma cu la capacitât di ospitâ e disvilupâ iniziativis di respîr plui larc”. Al è chest il judizi esprès dal president de Cjamare di Cumierç di Pordenon-Udine, Giovanni Da Pozzo, in sieradure dal mandât di Lucio Gomiero (inte foto) come aministradôr unic di Udin e Gurize Fiere.
“Chel che al è daûr a disvilupâ intal cuartîr di Martignà al è alc di plui larc e complès di une fiere normâl e al è cetant che i socis a àn volût di Gomiero” al à sotlineât Da Pozzo.
Gomiero, che nol sarà riconfermât, di part sô e à spiçât fûr lis ativitâts realizadis in chescj trê agns, sedi sul front des fieris, penalizadis de pandemie, sedi su chel dai fits des struturis a tierçs. Al à sotlineât acje il rûl fat de Fiere come hub plui grant pes vacinis in regjon.
Impuartant al è stât ancje il disberdeâ dai lavôrs di timp spietâts, fintremai 10 agns. “Infin o vin inviât i prins intervents par 1,9 milions di euros” al à sotlineât l’aministradôr unic. “Tra i risultâts di completâ la colaborazion cun Pordenon Fiere: si sin confrontâts su cualchi apontament, ma al reste dal lavôr di fâ”.
Tal ultin, Gomiero al à anunziât che di Jugn Arpa Fvj al trasferirà la proprie sede di Udin intal cuartîr fieristic.