La inflazion in Friûl no va jù: ancje +11% a pet dal 2022

A Jugn la inflazion e je lade jù a nivel nazionâl al 6,4% dal 7,6% dal mês di Mai. Lu à comunicât l’Istat, sotlineant che la decelerazion e je stade influençade dal câl fuart dai presits dai bens energjetics. In regjon i cambiaments no si son viodûts: la stime definitive de tabele dai presits al consum dal comun di Triest e à regjistrât un câl dal 0,2% a pet di Mai 2023, intant che al è restât invariât te citât di Udin. Il rialç al è dal 6,1%, invezit, a pet di Jugn di un an indaûr: auments record par prodots alimentârs e bevandis analcolichis (+11,6%), ristorazion (+8,4%), abitazion, aghe, eletricitât e combustibii (+7,5%), mobii, articui e servizis pe cjase (+5,9%). (A.I.) – 18.07.2023