La crisi economiche in Cine e la vuere in Ucraine no cuietin i progjets di Pmp Industries, il grup industriâl che al à il so cuartîr gjenerâl a Cosean e al è specializât inte produzion di sistemis di trasmission mecaniche par mieçs industriâi. Di fat, la aziende furlane nassude intal 1991 che e à sedis produtivis, logjistichis e comerciâls in Italie, Bosgne Erzegovine, Indie, Malesie, Cine, Brasîl e Stâts Unîts, e à sierât il 2022 cuntun faturât di 135 milions di euros, in cressite in dutis lis areis (Europe, Indie e Americhis) salf che in Orient Estrem dulà che invezit al è calât, ma si spiete cul gnûf an une riprese robuste, tant che l’obietîf pal 2023 al è di 162 milions di rigjâfs complessîfs, pâr a une cressite dal 20 par cent.
“Cundut dal cicli negatîf in Cine – al sclarìs il president Luigino Pozzo – no pensìn di lassâ chel Paîs, cemût che a àn fat za diviersis gruessis multinazionâls. Cumò su chel marcjât o sin restâts nô e i cinês e su chest fatôr o volìn pontâ, viodudis lis previsions di une cressite che e scomençarà intal 2023 e si consolidarà intal 2024”.
Il plan strategjic di Pmp Industries, inviât cierts agns indaûr, al è daûr a puartâ i siei risultâts. “Di une internazionalizazion interdipendente – al zonte Pozzo – o sin passâts a une regjonalizazion produtive cun dôs macroareis: Europe e Americhis di une bande e Indie e Orient Estrem di chê altre. Prime l’implant di Cosean, in Friûl, al dipendeve pe 85% di chel cinês; vuê, invezit, al è autonom intune cun chei altris sîts ocidentâi. Cumò ducj i implants – di là di chel furlan, chei in Bosgne, Usa, Indie, Malesie e in Cine – a son in atîf e a àn une vore di ordins. Chest al è il risultât de planificazion dai ultins dîs agns e cumò o stin planificant i prossims dîs: o vin di sburtâ ancjemò su la stabilitât de cualitât e dai procès produtîfs. Travuarts che no nus spaurissin, ma nus stimolin”. (A.D.G.) – 4.01.2023
