L’aument de Iva sul pellet al cree pinsîrs fuarts

L’Invier cun temperaduris clipis e la pression di Confcommercio l’an passât a son stâts ae base dal sbassament dal presit dal pellet ator dal 30% dopo i auments fuarts di presit dal periodi Covid, che a vevin di fat triplicât il cost dal sac di 15 chilograms di 4 a 12 euros. Intal 2024, però, o tornìn a une stagjon di auments par cause dal rialç de Iva dal 10% al 22%. “Cundut che il Guvier, par no interferî cul acuist dilunc dai mês plui frêts dal an, al vedi decidût di mantignî la Iva agjevolade al 10% par Zenâr e Fevrâr, in prospetive il cuadri al è no pôc preocupant – al comente Filippo Meroi, president dal grup Tecnoedili di Confcommercio provinciâl di Udin – parcè che cence fal al pesarà sul presit finâl. La problematiche e je posticipade dome ae fin de stagjon invernâl e soredut al prossim Istât, cuant che i citadins a fasaran provistis cul prestagjonâl in viste dal Invier 2024/25 e i nestris imprenditôrs a saran obleâts a auments tra il 10% e il 15%. O fevelìn di pellet di cualitât, certificât, cuntun benefici consecuent che al interesse vuê il 35% des fameis, une platee triplicade intal ultin deceni. O speri che il Guvier al torni indaûr, viodût apont il grant numar di citadins che a comprin chest materiâl”. (a.d.g.) – 22.01.2024