Intun an dal cuviert di une cjase in Friûl si puedin tirâ su’ passe 235 mil litris di aghe e cussì si rive a doprâ fintremai il 59% di ce che e à bisugne une famee.
Ve chi parcè che al è impuartant lâ bande de gjestion sostignibile de risorse idriche, tant plui che i cambiaments climatics a stan fasint dams, cun luncs moments di sec e ploiis une vore fuartis dutis intun colp.
Di racuelte de aghe de ploie si fevele joibe a Udin, in ocasion de cunvigne inmaneade dilunc de Fiere de Cjase moderne par cure di Confartigianato Imprese Udine des 5 e mieze di dopomisdì aes 7 e mieze di sere, li de Sale blancje, tal ingrès Ovest al prin plan a Martignà. Moderâts di Paolo Mosanghini dal Messaggero Veneto, a fevelaran Giorgio Turcati, cjâf categorie dai termoidraulics Confartigianato Udine e Fvg, Sergio Simeoni, dal Istitût di ricercje Irtef Udine e Alberto Budai, conseîr regjonâl.
A saran presints ancje esperts artesans che a gratis a displearan cualis che a son lis tecnichis e i prodots adats par meti su’ un implant di racuelte. (a.d.g.) – 30.09.2024
