Lis aziendis dal Friûl-Vignesie Julie a restin competitivis e a son bogns i nivei di ocupazion regjistrâts: a dissegnâ la situazion dal lavôr in regjon al è il Dipartiment industrie de Cisl F-Vj, che dal so monitorament trimestrâl e salte fûr une tignude sostanziâl dal sisteme industriâl, cun pocje variazion des crisis tra Setembar e Dicembar 2022.
Il dât che al varie, dut câs, al è chel che al rivuarde i motîfs des crisis rilevadis parcè che, cuintri lis spietis che a volaressin i coscj de energjie tra che plui impurtants, i elements principâi di impat a risultin la mancjance di ordenatîfs (in 18 câs su 65) e soredut lis dificoltâts leadis ai varis setôrs (25 su 65), intant che dome 8 aziendis tra chês che a jentrin intal control a son segnadis dal probleme energjetic.
“Un dât – al comente il responsabil dal Dipartiment industrie, Cristian Pizzo – che nus fâs rifleti e che al è confermât ancje di un altri element di no pôc cont. Se al è vêr che il teme des boletis energjetichis, di là des fameis, al impate cence fal su lis aziendis che a doprin plui energjie, cu la consecuence che lis impresis, par vie des primis stangjadis rivadis cu lis boletis, si son ativadis cun domandis preventivis di amortizadôrs sociâi, al è ancjetant vêr che la diference tra amortizadôrs doprâts e chei domandâts, si è fermade ator dal 27%. Chest al vul dî che, cundut dai pinsîrs legjitims, lis industriis dal Friûl-Vignesie Julie a mantegnin un posizionament impuartant intal marcjât in tiermins di competitivitât”. (A.D.G.) – 30.01.2023
