Il secuestri di cuasi un cuintâl di capis di colôrs intai dîs passâts de bande de Cjapitanarie di puart di Grau al à creât no pôc sconciert. Il consorzi associât a Legacoop Fvg ‘Co.Ge.Mo.’, che di 5 agns al à fermât in maniere volontarie la pescje des capis di colôrs propit par ripopolâ il mâr viodude la mancjance dal prodot, e à esprimût di fat no pôc cruzi pal compuartament di cui che al gjave in maniere abusive capis di colôrs ignorant i sfuarçs in cors par ripopolâ cun cheste specie lis nestris aghis.
“I pescjadôrs, par vie di une carence fuarte e progressive che e à colpît i bancs naturâi intai ultins agns, no pratichin la pescje di capis di colôrs dal 2018, cun consecuencis economichis che a àn segnât il setôr dal compartiment maritim”, al sotlinee Marino Regeni, president dal Consorzi che intal compartiment maritim di Monfalcon al conte 40 barcjis, lis unichis autorizadis ae pescje dai moluscs bivalvis in Friûl-Vignesie Julie.
“La pescje e je stade sospindude par preservâ i bancs di capis di colôrs sperant intune restaurazion ambientâl – al ricuarde Regeni -. Cu la poie dal Ministeri, de Regjon, de Cjapitanarie di puart di Monfalcon e la colaborazion impuartante dai Consorzis moluscs bivalvis di Vignesie e Clodie a son stadis puartadis a tiermin tra il 2019 e il 2021 dôs oparis di riativazion produtive cu la imission di capis di colôrs di mâr intes areis dai bancs naturâi”.
Propit par chest motîf, Co.Ge.Mo al dîs graciis ae Cjapitanarie di puart pe vigjilance dilunc de cueste e al augure une intensificazion dai controi in dutis lis areis dal compartiment “sedi par sconzurâ compuartaments scorets bande il consumadôr finâl, sedi viers dai operadôrs dal setôr”. (A.D.G.) – 26.06.2023
