Ae vuide di Legacoop F-Vj e je stade clamade Michela Vogrig, dal 2009 president dal consorzi Cosm e cumò prime femine a fâsi cjame de vuide de associazion che e rapresente lis cooperativis plui grandis de regjon, dopo che il president che al va fûr, Livio Nanino, al à decidût di no tornâsi a candidâ in sieradure dal so mandât cuadrienâl. La nomine de Vogrig je sucedude vuê a Tavagnà, intant dal Congrès che i àn partecipât cuasi 200 tra delegâts e invidâts.
“Pal imediât futûr – e à anticipât Vogrig disint graciis ai presints pe fiducie acuardade – a servissin politichis associativis buinis di interpretâ un contest in evoluzion svelte, une discontinuitât gjenerazionâl e di gjenar, no dome declarade ma reâl, buine di frontâ cuntun “altri pas” e cun prospetivis diviersis lis gnovis sfidis che nus dan daûr”. A son intervignûts intal cors dai lavôrs di matine l’assessôr regjonâl al Lavôr, Alessia Rosolen e il president dal Consei regjonâl Piero Mauro Zanin.
Dopomisdì invezit si è tignude la taule taronde titulade “Il 2° Principi cooperatîf: control democratic de bande dai socis”. Sentâts ae stesse taule, moderâts dal diretôr dal Messaggero Veneto, Paulo Mosanghini, a son intervignûts Paola Benini, president Confcooperative Alpe Adria, Simone Gamberini, diretôr di Coopfond e candidât president di Legacoop nazionâl, Tito Menzani, docent di Siencis aziendâls ae Universitât di Bologne, e Nanino, president che al va fûr di Legacoop Fvj. Al tiermin, prime des conclusions dal president nazionâl di Legacoop, Mauro Lusetti, i salûts dal president de Regjon F-Vj, Massimiliano Fedriga. (A.D.G.) – 27.01.2023
