Il Friûl-Vignesie Julie, su la fonde des declarazions presentadis intal 2023 (e riferidis ai redits 2022), al rive al novesim puest a nivel talian pal redit complessîf medi declarât pe Irpef (24.568 euros, 1.057 in plui dal an prime). La Lombardie e je la regjon plui siore cuntune medie di 27.886 euros, intant che dulinsom e je la Calabrie cun 17.162 euros. Lu à dit il ricercjadôr de Ires Fvg Alessandro Russo che al à elaborât i dâts dal Mef pandûts a nivel talian.
Il redit imponibil medi (cence lis spesis che si puedin gjavâ) in regjon al è di 23.616 euros (medie nazionâl di 22.806 euros). A nivel provinciâl Triest e à il valôr plui alt, ven a stâi 25.055, intant che Gurize e à chel plui bas cun 22.276 euros. Triest e je ancje la decime provincie a nivel talian (come l’an prime) e la seconde dal Trivenit dopo Bolzan.
A nivel comunâl il municipi plui siôr al è simpri Murùs cun passe 31 mil euros di medie; i va daûr Pagnà cun 28.650, Tarcint (27.572) e Cjampfuarmit (27.212). Tai ultins puescj si cjatin i Comuns des Vals dal Nadison, soredut Drencje, Grimac, Savogne, Stregne e Pulfar, indulà che la cuote dai redits di pension e je une vore alte e i valôrs medis a son sot dai 18 mil euros. (a.d.g.) – 24.04.2024
