Il Consei di aministrazion di Aeroporto Friuli Venezia Giulia Spa, vuidât di Antonio Marano, che al è origjinari di Tarvis, al à aprovât il progjet dal belanç di esercizi pal 2024 che al mostre dâts pardabon positîfs: l’an passât l’aeropuart al à regjistrât il 41,5% di passizîrs in plui, ven a stâi 1.319.813 a pet dai 932.767 dal 2023, intant che il valôr de produzion al è lât sù dal 31% a pet dal an prime rivant a 31,4 milions di euros. L’util, che al sarà di 4,8 milions di euros, al è in cressite dal 49,4% a pet dal 2023.
I invistiments sporcs a son stâts di 12 milions di euros, di chescj 7,7 a jerin bêçs de societât.
Il Consei al à ancje aprovât il belanç di sostignibilitât, li che a son stadis fatis iniziativis concretis par rindi plui vert l’aeropuart. (a.d.g.) – 27.03.2025
