L’andament dal Pil dal F-Vj, daûr des analisis dal Ufici Studis di Confindustria Udine su dâts Prometeia, al ven riviodût al ribàs a Otubar a pet des previsions dal Lui passât. In detai, si spiete une cressite in volum dal Pil regjonâl dal 0,8% intal 2023 e dal 0,6% intal 2024, 0,3 ponts percentuâi ogni an in mancul rispiet al senari delineât trê mês indaûr (in maniere rispetive, duncje, plui 1,1% e plui 0,9%). Lis variazions dal bieni ’23-’24 a son in linie cun chês de macroregjon dal Nord Est e plui altis in maniere lizere a pet di chês nazionâls (Italie: plui 0,7% intal 2023, plui 0,4% intal 2024).
A pet dal cuadri macroeconomic precedent, chel atuâl al cjape dentri un indebiliment de domande foreste, presits dal petroli e dal gas plui alçâts e cundizions di acès al credit plui dificilis.
Il F-Vj al è daûr a scontâ un indebiliment dal compart industriâl e un câl intai invistiments de edilizie.
Il valôr zontât de Industrie al è stimât patî une contrazion chest an dal 1,6%, chel des costruzions (che al veve regjistrât une cressite dal 10,9% intal 2022) dal 0,3%. In decelerazion i servizis, che il lôr valôr zontât al passarès dal plui 5,4% dal an passât a un plui 1,9% intal 2023. (a.d.g.) – 24.10.23
