Presits masse alts, i gjestôrs di albierc no stan. Confcommercio Federalberghi dal Friûl-Vignesie Julie e mande indaûr lis acusis sul cost masse alt di cjamaris e servizis dilunc chest Istât. “Se cualchidun al à esagjerât inte incressite des tarifis di bens e servizis – e aferme il president regjonâl Paola Schneider -, la categorie no pues jessi acusade di auments indiscriminâts, intune situazion là che a son cressûts par ducj i coscj gjenerâi, dopo un bieni segnât de pandemie che nus veve metût in maniere leterâl in zenoglon”.
La situazion, e va indevant Confcommercio Federalberghi F-Vj intune note, e je tant svariade: “A son localitâts in buine salût, in particolâr Triest e Grau, altris plui in dificoltât, ma là che no vegnin sù auments di presits superiôrs a une inflazion che e lenç il dîs par cent. Tal stes timp, a son diferenziâts i moments che a son daûr a passâ i diviers comparts. Al è cui che al sofrìs in tiermins di ocupazion. Cui che al è daûr a vê risultâts simii o fin miôr di un 2022 che e je stade une stagjon ecezionâl se o pensìn che si jere in jessude dal Covid; cui, invezit, che al è in maniere decise sot dai nivei dal 2019. Di chi l’inviament di strategjiis diviersis sul front tarifari, ma cuntun element comun in sostance: auments in linie cu la tindince de inflazion”.
Sui auments che i stes gjestôrs di albierc a patissin, il messaç al è clâr. “Al è indiscutibil che e je stade une vere e proprie esplosion, tacant dai prodots alimentârs, ma ancje dai servizis che i albiercs a àn di garantî par podê jessi ae altece des esigjencis e des domandis de clientele. In chest moment – e conclût Confcommercio Federalberghi F-Vj – o crodìn che al sedi fondamentâl evitâ critichis ingjenerosis e oportun promovi la ecelence dal turisim regjonâl, in concertazion cu la Regjon e i ents locâi”. (a.d.g.) – 31.08.23
