Premiadis lis ecelencis de economie regjonâl

Al Teatri “Giovanni da Udine”, la Camera di Commercio di Pordenone Udine e à organizât lunis dopomisdì la cerimonie anuâl di Premiazion de economie e dal disvilup. Ae cunvigne a son stâts premiâts ben 80 tra imprenditôrs, lavoradôrs e personalitâts che cul lôr impegn cuotidian a fasin grant il Friûl, ancje difûr dai confins regjonâi. Tra i premis, trê lis Targhis de ecelence (pe economie a Giovanni Fantoni e Giuseppe Bono e ae memorie dal diretôr dal Messaggero Veneto, Omar Monestier) e 10 i ricognossiments speciâi. Ospit di onôr de manifestazion al è stât il president di Confcommercio nazionâl, Carlo Sangalli. Lis conclusions a son tocjadis daûr de tradizion al president de Regjon, Massimiliano Fedriga. (A.I.) – 11.10.2022