“Il Friûl-Vignesie Julie e sarà la prime regjon in Italie a garantî la eletrificazion des banchinis di ducj i siei puarts, contribuint cussì in maniere sensibile ae riduzion des emissions nocivis che si verifichin in particolâr intes fasis di abordament”. Lu à anunziât l’assessôr regjonâl aes Infrastruturis e Teritori Cristina Amirante in ocasion dal Barcolana Sea Summit al Triest Convenzion Center dal Puart Vecjo.
“Propri la setemane passade – e à dit Amirante – a son stadis publicadis lis dôs garis pe realizazion de eletrificazion des banchinis dal puart di Noiâr e dal puart di Monfalcon, intant che chêl di Triest al veve inviât za prime la transizion in graciis dai fonts dal Pnrr. Si calcole che lis emissions che a laran jù, di anidride carboniche e nocivis, a corispuindin al 30% dal totâl mandât fûr intai puarts”.
L’assessôr e à evidenziât cun di plui che “tal puart di Noiâr al sarà fat, intal stes timp, un implant fotovoltaic par alimentâ la eletrificazion e al sarà doprât un sisteme une vore inovatîf in mût che, cuant che no son lis nâfs, la energjie no ven straçade, ma e ven cumulade e doprade dentri tal puart”. (a.d.g.) – 04.10.23
