Screât vuê di matine a Paluce il gnûf Centri di formazion dal Cefap, ae presince dai assessôrs regjonâi al Lavôr e ae Formazion Alessia Rosolen e aes Risorsis agroalimentârs Stefano Zannier, dal sindic dal paîs cjargnel Luca Scrignaro e dal president dal Cefap Sergio Vello.
Intal Centri di formazion di Paluce il cors di riferiment al è il percors di istruzion e formazion professionâl pensât pai zovins che a vegnin fûr de scuele medie, ven a stâi la cualifiche trienâl di assegnât aes ativitâts ambientâls su la mont, cun di plui un cuart an par cjapâ il diplome professionâl di tecnic dal bosc. Il cors al è un câs unic in regjon e al ponte a preparâ lavoradôrs che a son cirûts de filiere bosc-len.
“Il Centri – al à visât dilunc de cerimonie de scree Vello – al è furnît di laboratoris e di un convit par judâ la iscrizion e la frecuence ancje di students che a rivin di lontan o che a àn problemis di traspuart. La viertidure dal gnûf edifici e je ancje l’esit de colaborazion di tantis istituzions e dai tancj privâts che a àn metût a disposizion lis lôr struturis aziendâls pes lezions pratichis ai students iscrits che cumò a son 35”. (a.d.g.) – 16.01.2025
