Il gnûf implant al met dacuardi dôs esigjencis opuestis epûr dutis e dôs sintudis dal teritori: un canâl scolmatôr che al moreste i eventuâi dams dal torint Tor, e un implant di irigazion che al servìs cumò 40 etars (ma a podaressin rivâ a plui di 130). Gjavâ aghe dulà che ‘nd è masse e puartâle dulà che e ocôr: chest ultin al è il fin dal implant “Pra di Tor”, screât ai 26 di Mai a Naiarêt de Tor di S. Vît de Tor, in presince di tantis autoritâts come il Comissari dal Comun Silvia Zossi, il president dal Consorzi di Bonifiche Planure Furlane Rosanna Clocchiatti, l’assessôr regjonâl aes Risorsis agroalimentârs, forestâls e itichis Stefano Zannier, la europarlamentâr Elena Lizzi.
“Un grant lavôr di scuadre – al à comentât ae cerimonie il president dal Consorzi Clocchiatti – che al à mitût adun i agricultôrs, il teritori, la Regjon. E in pôcs mês l’implant al è stât metût in funzion”. “Une opare corâl – al à confermât il Comissari Zossi – al servizi de comunitât”. L’assessôr Zannier al à ricuardât la urgjence di un ûs razionâl de risorse idriche: i consums a van ridots, lis alis a son in dificoltât (ancje se no a S. Vît de Tor dulà che, cemût che al à evidenziât il diretôr tecnic dal Consorzi Stefano Bongiovanni, i nivei a son simii a pet dal 2008, an de prime progjetazion de opare). (A.D.G.) – 26.05.2023
