Screât vuê di matine il gnûf negozi cu la insegne Despar in vie Torino a Pasian di Prât, ae presince di Fabrizio Cicero, diretôr regjonâl Despar Nord pal F-Vj, dal sindic di Pasian di Prât Juli Peressini, dal assessôr comunâl aes Ativitâts produtivis Estel Zomero e dai titulârs Elvira Rorato e Michele Panzanini de aziende Giona Srl.
Il supermarcjât al à une superficie di vendite di 398 metris cuadris cun implants a bas impat ambientâl e che a sparagnin energjie.
I titulârs dal negozi, Elvira Rorato e Michele Panzanini, a lavorin di agns tal setôr de grande distribuzion e di sîs agns a gjestissin il pont vendite de Despar di vie Cosattini tal centri di Udin.
“La viertidure di vuê – al à dit Cicero – e slargje ancjemò di plui il numar dai afiliâts ae nestre marche, che cumò e pues contâ su 81 ponts di vendite su un totâl di 160 buteghis cun marche Despar, Interspar e Eurospar inte nestre regjon”. (a.d.g.) – 16.10.2024
