Il grup Sereni Orizzonti – tra lis primis trê realtâts in Italie inte costruzion e gjestion di residencis par anzians, cun 80 Rsa e plui di 5 mil puescj jet in Italie e tal forest – al cîr 250, fra infermîrs e operadôrs sociosanitaris di impleâ intes struturis operativis o in fase di viertidure.
La aziende e à previodût cun di plui le viertidure di gnovis struturis intal prin semestri dal 2023 in Friûl -Vignesie Julie (a Fontanefrede), in Piemont (a Borgo Ticino e La Loggia) e in Sardegne (a Villacidro). Lis gnovis struturis a varan 330 puescj jet.
“Intal nestri Paîs cjatâ i professioniscj al è dispès tant complicât – al declare Massimo Blasoni, azionist di maiorance dal Grup -. La mancjance di personâl sanitari, in particolâr Oss e infermîrs, al à un pês tant impuartant pal setôr privât, par vie dal assorbiment fuart di personâl de bande dai ospedâi”.
La ricercje e je slargjade in dute Italie: Sereni Orizzonti al valude ancje profîi che a vegnin di regjons dal Centri e Sud Italie, ufrint un incentîf economic a chei che a son disponibii al trasferiment. Ducj i professioniscj interessâts a puedin inviâ i lôr curriculum vitae ae direzion uficiâl segreteria@sereniorizzonti.it. (A.D.G.) – 4.01.2023
