Une delegazion de Universitât di Siencis aplicadis de Carinzie (Cuas) e à visitât di pôc il Lab Village dal Ateneu furlan. I ospits, une cuindisine, a son stâts ricevûts intal pôl di ricercje aplicade avanzade di vie Sondrio dal retôr de Universitât di Udin Roberto Pinton e dal delegât ae Internazionalizazion Giorgio Alberti, intune cun Giancarlo Lauto, dal Dipartiment di Siencis economichis e statistichis, Pietro Corvaja, diretôr dal Dipartiment di Siencis matematichis, informatichis e fisichis; Alessandro Gasparetto, diretôr dal Dipartiment Politecnic di inzegnarie e architeture e Sabrina Strolego, consul onorari de Republiche austriache pal Friûl Vignesie Julie.
“La visite dai coleghis austriacs – al à sotlineât Pinton – al à vût l’obietîf di rinfuarçâ lis colaborazions in cors tra l’Ateneu e la Universitât di Siencis aplicadis de Carinzie”. “Il guvier austriac – e à visât invezit Strolego – al è une vore interessât a supuartâ iniziativis di colaborazion intal cjamp de formazion e de ricercje cun ents e universitât dal Friûl Vignesie Julie, regjon definide la ‘Silicon Valley di Italie’ pal alt numar di ricercjadôrs che a son a stâ e la alte concentrazion di centris di ricercje e istitûts sientifics ospitâts”. (ADG) – 15.11.2022
