Cui che al pensave che su la zootecnie regjonâl al fos tornât il seren, al à scugnût tornâ a ricrodisi. L’andament balarin dai presits di materiis primis e energjie, i efiets dai cambiaments climatics, normativis comunitariis che dispès no tegnin cont des carateristichis particolârs dai nestris arlevaments, i ostacui che a fasin deventâ dificil il percors di un setôr che in regjon al conte, daûr dai dâts difondûts di Renzo Livoni, president confermât de Associazion Arlevadôrs F-Vj, su 600 aziendis e plui o mancul 50 mil vacjis di lat.
Par capî ce che al vûl dî gjestî in dì di vuê une stale, o sin lâts a S. Salvadôr, frazion di Maian, dulà che e lavore la aziende agricule Minisini, che e gjestìs un implant moderni cun 115 bovins. A fânus di vuide Greta Minisini (di pôc nomenade president dai imprenditôrs zovins Coldiretti F-Vg), in sachete une lauree magjistrâl in Agrarie, otignude ae Universitât dal Friûl, tante passion e tantis ideis. Inte aziende a lavorin il pari Andrea, la mari Odina e il cusin Emanuele Papinutto. Greta e rapresente la tierce gjenerazion inte aziende di famee; e je propit jê a vê dât il vie a une serie impuartante di cambiaments che a àn permetût une preparazion plui moderne de stale (spazis plui amplis e dedicâts daûr lis dibisugnis dai animâi) e la adozion di gnovis tecnologjiis tant che il robot di molte. Nuie plui vacjis costretis a vivi in spazis strents, materassin fof tal puest dal fen intai jetuts, ventiladôrs par fâ front al cjalt, spazis dedicâts aes vacjis gravidis, a chês che a àn a pene parturît e ancje aes gnovis rivadis, parcè che, cemût che nus à sclarît la nestre vuide, lis vacjis a rispietin tra di lôr une jerarchie ben precise.
“Il setôr zootecnic al è cambiât e al continue inte sô metamorfosi – e sclarìs -. Gjavadis lis vicendis storichis cognossudis, prime fra dutis la cuistion des cuotis lat, ancje la rivade di gnovis normativis europeanis, come chês dedicadis a benstâ animâl e sostignibilitât ambientâl, a àn a lôr volte provocât la sierade di tancj piçui arlevaments. Miorâ su chescj aspiets al compuarte invistiments impuartants, ma dispès lis piçulis aziendis no àn i capitâi e lis reditivitâts suficientis par frontâ chescj cambiaments, a diference dai implants plui grancj che a puedin fâ economiis di scjale”.
Dopo a son rivâts il Covid e il conflit ucrain che a àn complicât lis robis: “O stin vivint un periodi di inciertece assolude – e conferme la imprenditore -. La vuere e à sburtât aes stelis il cost des pasturis e de energjie. Il presit dal lat al è lât sù, ma cuntune dinamiche cuietade: cuant che al è deventât sostignibil pai arlevadôrs, i problemis si son butâts jù sui trasformadôrs e, di consecuence, sui consumadôrs. Par chel che al inten i coscj energjetics, si sin in part salvâts dai auments parcè che o vevin di pôc sotscrit un gnûf contrat, ma, a pene che al è scjadût, lis boletis a son sclipignadis adalt”.
E dopo a son ancje i problemis causâts dai cambiaments climatics:
“A pet dal pesant sec dal 2022 nô si sin salvâts parcè che o produsìn in propri lis mangjaduris.
O vin vût di cambiâ in curt lis strategjiis e dirotâ lis culturis di blave dedicade trasformantlis in insilât, destinât ae alimentazion dai animâi, ancje se dal sigûr in chest mût o vin patît une pierdite”.
Par fâ front a chest burlaç, lis aziendis zootecnichis furlanis a àn di acetâ une sfide impuartante: “La tornade des personis ae scuvierte dal nestri teritori – mai viodude tante int a spassizâ intai cjamps cemût che in chescj agns, e conte Greta – nus sburte inte direzion di diversificâ lis produzions, cjalant ancje ae orticolture e ufrint in maniere direte i nestris prodots ai consumadôrs, magari disfrutant gnûfs struments: il sît realizât de Associazion arlevadôrs che e à metût a disposizion des aziendis un portâl indulà meti in vetrine i lôr prodots, al compuarte beneficis palês ancje in tiermins di valorizazion dal teritori.
Cun di plui, lis gnovis tecnologjiis a miorin une vore il lavôr in stale e intai cjamps, dant struments straordenaris di analisi e gjestion. Ciert al servìs timp par elaborâ e meti in pratichis chestis novitâts, ma al sarès un erôr restâ fers a cjalâ ce che al sucêt”. (A.D.G.) – 30.06.2023
