La industrie in Friûl-Vignesie Julie e frene ancjemò. I indicadôrs dal tierç trimestri dal an, elaborâts de Confindustrie regjonâl, a son in grant part cul segn mancul, sedi a nivel conzunturâl che tendenziâl, ancje par vie dal ralentament de Gjermanie che si fâs sintî un grum. La produzion industriâl e va jù dal 6,8% a pet dal plui 0,1% dal trimestri di prime. Contrazion fuarte ancje pes venditis – jù dal 10,3% a pet dal plui 7,1%, dal trimestri di prime e dal plui 1,4% regjistrât intal 1n trimestri 2023 – e i gnûfs ordins che si confermin in picade: mancul 10% dopo dal mancul 5,8% dal secont trimestri. Numars in linie intal confront cul tierç trimestri dal 2022. La produzion e segne un mancul 7,2%, lis venditis il mancul 9,3% e i gnûfs ordins mancul 13,3%. La ocupazion e continue dut câs a mantignîsi stabile, regjistrant ancje une lizere incressite.
No son buinis nancje lis previsions pal ultin trimestri dal an. Par un imprenditôr su doi la produzion e calarà ancjemò, cussì tant che la domande interne o foreste. Cundut dai nûi, però, la maiorance des impresis e je pronte a potenziâ i invistiments sul front de digjitalizazion e de sostignibilitât ambientâl, un pôc mancul pal eficientament energjetic, risorsis umanis e ricercje e disvilup. Infin, une largje maiorance dai intervistâts e previôt une conferme des cundizions di cumò dal credit, cun ben il 99% che al riten stabil l’andament dai afidaments pai prossims 3 mês, il 52% che e stime la incressite intai tas bancjaris e il 94% che al previôt une conferme des cundizions di garanziis di cumò. (a.d.g.) – 29.11.2023
