La citât e je simpri plui trative pai turiscj, tant che l’an passât a son cressûts i visitadôrs, soredut dilunc des fiestis di Nadâl. Udin e je stade di fat visitade tal 2024 di plui o mancul un milion e 740 mil personis, cuntune cressite di uns 200 mil turiscj a pet dal 2023, ven a stâi plui 6,7%.
I dâts de ricercje fate dal Ateneu dal Friûl a son stâts presentâts vuê dal vice sindic di Udin, Alessandro Venanzi, adun cui referents dal progjet coordenât di Salvadore Amaduzzi.
L’80% dai visitadôrs a son talians e il 20% forescj, in cressite di doi ponts percentuâi a pet dal an prime. Pics plui alt sot des fiestis di Nadâl cun 35 mil visitadôrs in plui a pet dal 2023 (plui 8,1%).
I visitadôrs forescj a rivin prime di dut di Austrie, Slovenie e Polonie, Paîs che al à cjapât il puest dal Ream Unît, tierç par divignince tal 2023. (a.d.g.) – 04.04.2025
