La Inteligjence artificiâl e met in pericul in Friûl-Vignesie Julie cuasi un puest di vore su cuatri, soredut se al è cualificât. A dîlu al è un rapuart di Confartigianato sul impat de IA sul marcjât dal lavôr. Stant ai dâts, inte nestre regjon la cuote di personâl a risi e lenç il 23%.
La percentuâl e pues semeâ alte, ma il pericul al è plui contignût sedi a pet de medie europeane (39,5%), sedi a chê nazionâl (36,2%). La nestre regjon si place al novesim puest de classifiche taliane. Intes primis posizions si cjatin Lombardie, Lazi, Piemont e Val Di Aoste. A nivel european, i Paîs plui in pericul a son Lussemburc, Belgjiche, Svezie, France e Gjermanie.
Lis professions plui espostis a son chês plui cualificadis e a contignût inteletuâl: tecnics de informazion e de comunicazion, dirigjents e specialiscj de aministrazion, cjapât dentri il setôr public, dal cumierç e de sience. Plui sigûrs i lavôrs che a previodin une componente manuâl no standard.
Stant al rapuart, il 6,9% des Pmi talianis al dopre robot, cuintri il 4,6% de medie europeane e il 3,5% de Gjermanie. Cun di plui, il 5,3% des nestris Pmi al dopre la Inteligjence artificiâl e il 13% al previôt di invistî inte sô aplicazion. “Nol è robot o algoritmi – al sotlinee il president di Confartigianato Marco Granelli – che a puedin copiâ il savê artesan e simulâ la anime dai prodots e dai servizis biei e ben fats dal made in Italy”. (a.d.g.) – 24.08.23
