Lignan, cun Tisane e Maran, al risulte vê un valôr zontât di 1 miliart e 35 milions di euros. E se a Lignan, in particolâr, il valôr zontât che al derive dome dal turisim in sens strent al è il 72% dal totâl, al è clâr che il compart al influence ancje la vivarosetât di ducj chei altris setôrs economics.
Il calcul al è stât fat di Quantitas e Questlab Srl intal ambit di une analisi realizade su iniziative dal Comun di Lignan e cu la poie de Cciaa di Pordenone-Udine. A presentâ la ricercje inte Sale Gianni Bravo dal ent de Cjamare a Udin, Nicola Ianuale, aministradôr e fondadôr di Quantitas e Questlab, cun a flanc la sindiche di Lignan Laura Giorgi e ancje il “paron di cjase”, il president de Cciaa Giovanni Da Pozzo, e l’assessôr regjonâl aes Ativitâts produtivis e al Turisim Sergio Emidio Bini.
Il valôr zontât – e intal specific il calcul su la compartecipazion dai diviers comparts economics – al è stât pussibil, al à sclarît Ianuale, in graciis dal incrosament di diviersis fonts informativis tant che Istat, Prometeia, Cjamare di Cumierç, Inps, Banca d’Italia, Comun e altris. Tisane e à une cuote di valôr zontât turistic pâr al 17,3% dal totâl, Maran al segne il 38,4%. “Lignan dal sigûr le fâs di parone intal setôr – al à introdot il president Da Pozzo –, fasint i trê cuarts dal valôr zontât propit in conession direte cu la ativitât turistiche; di cheste però a dipendin in misure cuasi totâl ancje i comparts de industrie, dal artesanât, des costruzions, dal cumierç, dal agroalimentâr e dai servizis”. (a.d.g.) – 05.12.2023
