No mancje la domande, e mancje la ufierte. Chest l’element che al à caraterizât il 2022, ancje se il rialç dai mutuis intal ultin trimestri al à causât un ralentament de domande, intant che i presits a son lâts sù. A dilu il president provinciâl Confcommercio Fimaa Lino Domini ae presentazion dal Borsino 2022, la “biblie” dal marcjât imobiliâr dal teritori. “Il marcjât – al comente Domini – al è in buine salût, tirât des abitazions gnovis che a àn segnât un aument considerevul dai valôrs medis. Propri il rialç dai tas di interes al sugjerirès di no spietâ timps miôr par cui che al vûl cuistâ. Il marcjât dai fits al risulte ancje vivarôs, cuntune domande in altre cressite e une ufierte cuasi stabile”.
A Udin, cemût che in chês altris citâts, i valôrs par metri cuadri dal gnûf a son stâts condizionâts dal aument dai coscj dai materiâi edîi, dai auments di presit de energjie, de reperibilitât dificile di lavoranzie, causâts ancje di une domande fuarte pal bonus 110%. I imobii di gnove costruzion o ristruturazion totâl intal centri storic a Udin a àn patît un aument massim dal 27,5% a pet dal 2021, tocjant i 5 mil euros al metri cuadri. “Chescj presits – al precise Domini -, a son chei di cjasis cun carateristichis costrutivis a alt nivel tecnologjic, finiduris di cualitât, massim confort abitatîf, coscj energjetics puartâts cuasi a zero. Dute la citât, simpri pai imobii gnûfs, e regjistre valôrs in cressite intes zonis di domande fuarte, tant che chê dal ospedâl, dulà che si tocje il plui 16,5% sul 2021. Auments ator dal 10% si regjistrin ancje par cui che al à comprât chest an la seconde cjase al mâr e in mont”. (A.D.G.) – 2.01.2023
