Cimolai e Luigi Cimolai holding, colòs mondiâi des grandis costruzions, a son stadis ametudis al concuardât preventîf de sezion specializade in materie di imprese dal Tribunâl di Triest. A anunziâlu e je stade la stesse aziende pordenonese cuntun comunicât curt inte sere sul tart di joibe ai 23 di Març. Un pas impurtant pe sorevivence de Cimolai, sfrenzude di une crisi finanziarie tant pesante, cuntune esposizion debitorie di plui di 600 milions di euros par vie di cualchi operazion cui derivâts, finide mâl, a cuviertidure dal pericul su cambi euro-dolar.
Il plan di salvament, presentât da legâi ai 20 di Fevrâr, al pues cussì scomençâ. Prin di dut traviers la creazion di une newco-la Nuova Cimolai, partecipade dal dut de Luigi Cimolai Holding, che a titul onerôs e cjaparà ducj i asset, i contrats e chei altris elements patrimoniâi de Cimolai, di là dal cuasi miâr di dipendents direts de aziende.
Chest al permetarà la continuitât aziendâl e di lâ indevant a fâ profits cu lis comessis di 800 milions in tacuin, par scomençâ a paiâ i debits, cun bancjis e altris ents. In paralêl al continue la ricercje di gnûfs socis che, intune cuntun aument di capitâl sigurât de famee Cimolai, a puedin rimeti in sest lis cassis de societât.
Cu la amission al concuardât preventîf, lis realtâts interessadis – si jerin fats i nons di Webuild, Vinc e Fincantieri – a podaressin acelerâ su la operazion. (A.D.G.) – 24.03.2023
