Vie libare dai socis di Hydrogea pe fusion cul Cafc

Ducj i 21 i Comuns socis di Hydrogea a àn acetât la fusion cul Cafc (Consorzio acquedotto Friuli centrale) inte riunion di vuê di matine, intal municipi di Pordenon.

Pal vicesindic dal cjâf lûc dal Friûl Ocidentâl, Alberto Parigi, cheste operazion no pues jessi rimandade e no son plui dubis su la sô impuartance. La gnove societât e nassarà forsit dentri de Sierade prossime e e sarà buine di gjestî la aghe in 154 Comuns, deventant il gjestôr plui grant dal Nord Est.

Chest al varès di puartâ beneficis sedi pes tarifis, sedi pai invistiments. Passadis lis rognis finanziariis, cumò e cjale cun plui serenitât ae prossime fusion. (a.d.g.) – 21.02.2025