La vuere dai dazis tacade dal president dai Stâts Unîts al va a risi di mandâ par aiar il marcjât dal vin. Lis menacis di Donald Trump di meti il 200% di dazi sui vins se la Union Europeane no gjavarà chei al 50% metûts sul whisky a fasin tremâ il setôr che al vâl centenârs di milions di euros e 350 milions di butiliis.
Pal vin furlan, soredut prosec di Pinot grîs, il marcjât american al è di timp in cressite. “E sarès une catastrofe – al conte Rodolfo Rizzi, diretôr de Cantina di Ramuscello – parcè che tai Stâts Unîts al va almancul il 20% de produzion. Vuê une butilie di 5 euros e rive in vendite dai americans a 20 euros e altris auments no saressin sopuartabii pai lôr impuartadôrs”.
Une vore in pinsîr ancje Stefano Trinco de Cantina Pitars e president di Doc Friuli: “O sperìn che e sedi dome une sbarade parcè che al volarès dî pierdi tocs di marcjât impuartants e ancje dazis al 25% nus fasin patî”.
Al è in pinsîr ancje dut il setôr agroalimentâr de nestre regjon, che al vâl cuasi doi miliarts, di chescj il 10% al va tai Usa. (a.d.g.) – 14.03.2025
