Ai 18 di Otubar e tache la gnove campagne di promozion realizade de ARLeF – Agjenzie regjonâl pe lenghe furlane. “Cui che al sa il furlan, al sa di plui”: al è chest il messaç consegnât ae simpatie e ae fuarce comunicative di Catine e trasmetût tant che spot par television, radio e su lis pagjinis de stampe su cjarte e de comunicazion web e social. Un messaç che al marche cemût che fevelâ par furlan ai propris fîs e nevôts, fin di piçui, ur regali tancj vantaçs cognitîfs, culturâi e sociâi.
La iniziative e je stade presentade de ARLeF ai 17 di Otubar, in ocasion di une conference stampe che si è tignude te sede de Regjon Autonome Friûl-Vignesie Julie di Udin, li che a àn partecipât l’assessôr regjonâl aes Autonomiis locâls, Pierpaolo Roberti, il diretôr de Agjenzie, William Cisilino, e la testimonial de campagne, Caterina Tomasulo (in art, Catine).
La narazion dal spot video “Cudumars”, che al sarà trasmetût su tv, web e social, si fonde in particolâr suntun messaç: fâ cressi la cussience che fevelâ par furlan in cjase e je une risorse. Mari e pari a taule a fevelin par furlan tra di lôr, ma cui fîs a passin simpri al talian, ancje par cirî di convinci il piçul Fabio a mangjâ i cudumars che al à tal plat. Al è chi che e jentre in sene une Catine in miniature… e mari e pari no i pensaran plui sù dôs voltis tal indreçâsi par furlan ancje ai fîs.
“Tramandâ la lenghe furlane, slargjâ il so ûs, al è un dovê etic, morâl e istituzionâl. Campagnis come chê di vuê a judin a supuartâ l’ûs de lenghe e a rinfuarcin il Friûl-Vignesie Julie tant che Regjon a Statût speciâl. Il nestri teritori al à dentri tantis diversitâts ambientâls, culturâls e linguistichis; plui lis valorizìn, plui si rinfuarcìn”, lu à dit l’assessôr regjonâl aes Autonomiis locâls cun deleghe aes Lenghis minoritariis, Pierpaolo Roberti, che al à ancje marcât che “la Aministrazion regjonâl e va indenant a sostignî l’ûs dal furlan, calcolât tant che un valôr zontât di un pont di viste identitari e culturâl, di no dispierdi”. Ma chê di vuê, pal esponent de Zonte Fedriga e je soredut “une operazion che si à di interpretâ tant che une difese dal nestri Statût di autonomie che vuê, coladis lis resons storichis che par chês la autonomie e jere stade concedude, e à intes lenghis minoritariis l’unic element par difindi la nestre specialitât”. Tal riafermâ la impuartance di lâ dilunc cun azions finalizadis a tutelâ e a promovi lis lenghis presintis tal teritori, l’assessôr regjonâl al à ricuardât il Plan Gjenerâl di Politiche Linguistiche, fat bon tal 2021 e che al à une durade di 5 agns, “che al à segnât il pas a pet di ce che al è stât fat prin, graciis a indicazions precisis su la ativitât di puartâ indenant: azions che a domandin une prospetive lungje e che a podaran vê la continuitât necessarie dilunc di dute la legjislature”.
“La ARLeF e mande fûr in maniere periodiche campagnis di promozion de lenghe – al à sclarît il diretôr de Agjenzie, William Cisilino -. Chê che o presentìn vuê e à l’obietîf di sensibilizâ i gjenitôrs e i nonos a fevelâ par furlan cui propris fîs e nevôts. Lu disìn dispès, ma mai avonde: i vantaçs di une educazion plurilengâl a son tancj e a dânus reson e je ancje la ricercje sientifiche. Cui che al cres fevelant plui lenghis al à plui facilitât a imparâ ancje altris, l’inglês prin di dut. Ma al è ancje furnît di capacitâts logjichis e matematichis miôr e al à plui creativitât e viertidure al mont. Midiant di cheste azion di comunicazion multicanâl, o cirarìn di fâ capî che la fonde di ogni azion di politiche linguistiche e je la famee. Fevelâ par furlan “a cjase” al è une fortune, no dome pal patrimoni culturâl unic che al ven trasmetût, ma soredut parcè che, come che o vin a pene dit, al ufrìs tancj vantaçs. O vin volût tratâ ducj chescj concets cuntun stîl lizêr e divertent e par fâlu si sin fats judâ di Caterina Tomasulo, cognossude miôr cul non di “Catine”, che e je rivade a fâlu in maniere perfete”.
“Par me al è stât une vore interessant partecipâ a cheste iniziative de ARLeF, massime viodi trop lavôr che al è daûr di un filmât di mieç minût. O ai acetât vulintîr, ancje parcè che cundut che o sedi “furlane in maniere diferente”, o soi inamorade di cheste lenghe. Jo o dîs simpri tai miei spetacui: il furlan al jude il multilinguisim, par vie che al à dentri di se dutis lis lenghis dal mont, e i fruts a son tant plui ricetîfs, par chest al è impuartant doprâlu cuant che o comunichìn cun lôr. Cun di plui, fevelant la proprie lenghe, si mantegnin lis lidrîs e la identitât”, e à dit Catine.
La vôs e la simpatie di Catine a marchin la impuartance di fevelâ par furlan te relazion tra gjenitôrs e fîs e tra nonos e nevôts ancje tal spot radiofonic.
La campagne Cui che al sa il furlan, al sa di plui e cjape dentri infin i cuotidians, i setemanâi e i mensîi principâi dal teritori di lenghe furlane. Dongje di cheste si zonte la planificazion sui social Facebook, Instagram, YouTube e TikTok. (a.d.g.) – 17.10.23
