Ae fin, dopo agns di bataie, e je rivade la autorizazion dal Ministeri dal Ambient e de Sigurece energjetiche par podê liberâ la trute iridee intes aghis dal Friûl-Vignesie Julie.
Si trate de conclusion di une bataie tacade timp indaûr, cuant che ancjemò al jere in vite l’Ente tutela Pesca, daspò deventât Ente tutela patrimonio ittico. In chê volte, lis normis talianis fatis buinis par dâ esecuzion a une diretive europeane, a vevin improibît di liberâ intai flums pes che nol fos origjinari de nestre zone. Di Rome a vevin dât un prin vie libare, tal 2021, par molâ la iridee dome intai canâi artificiâi, fat che al à permetût di tornâ a inmaneâ lis garis di pescje che a jerin stadis blocadis par une vore di agns propit pal fat che la trute iridee, che no je origjinarie des nestris aghis, ma di chês de Americhe dal Nord, no podeve jessi liberade in nature. Tal 2023 e je rivade la autorizazion a molâ ancje la trute fario in cualchi flum naturâl.
Cumò e je rivade la ultime autorizazion, come che al à visât l’assessôr regjonâl Stefano Zannier, dal Ministeri ancje par liberâ la trute iridee in cierts flums e torints de nestre regjon. (a.d.g.) – 29.08.2024
