Menaçade e agredide a peraulis. Le à viodude brute, îr, la gjornaliste dal Messaggero Veneto, Elisa Michellut, che in vie Europa Unita, a Udin, e jere daûr a cjapâ sù des testemoneancis dopo une rapine cometude sabide di sere in zone.
A menaçâle e ofindile in maniere pesante e je stade la banconiere di un locâl public, indulà che la croniste si jere dreçade. Intimidazions cuintri Michellut, che duncje e à decidût di dâ fûr denunzie ai carabinîrs, a son rivadis ancje di cualchi client dal esercizi public. Un om, in particolâr, al à comandât ae gjornaliste di lâ vie alçant il braç, a pôcs centimetris de sô muse.
Assostampa Fvg e Ordin regjonâl dai gjornaliscj a esprimin solidarietât ae coleghe e a rilancin inte ocasion il teme de sigurece dai professioniscj de informazion intal esercizi simpri plui a pericul dal propri lavôr, tutelât de Costituzion. (A.D.G.) – 13.06.2023
