A son cuatri i premiâts di chest an pe edizion 46 dal Premi Nadâl furlan inmaneât dal Circolo culturale laurenziano di Buie, che la cerimonie e sarà fate – pe prime volte inte storie dal premi – a Glemone, inte sale consiliâr di palaç Boton sabide ai 7 di Dicembar aes 5 dopomisdì.
I nons a son chei dal gjornalist e scritôr Toni Capuozzo, Antonio Colussi dirigjent scolastic, Livio Jacob, fondadôr cu la sô femine Piera Patat de Cineteca dal Friûl, e Kevin Molaro, che al à cjapât il premi speciâl “zovins” pe sô ativitât di volontariât.
A sielzi i nons la jurie indulà che a jerin presints, di la dai components dal Circolo Culturale Laurenziano che al promôf la manifestazion, il vice president dal Consei regjonâl Stefano Mazzolini, il vice president de Societât Filologjiche Furlane Carlo Venuti e i assessôrs ae Culture di Glemone e di Buie Flavia Virilli e Alberto Guerra.
“Ancje in cheste edizion – al vise Maurizio Piemonte, president dal Circul – la jurie e à selezionât nons di grant valôr uman, artistic e sociâl, personalitâts di puartâ come esempli pe nestre comunitât e che a dimostrin la grande ricjece morâl dai furlans”. (a.d.g.) – 05.12.2024
