La ativitât de ARLeF – Agjenzie regjonâl pe lenghe furlane dedicade ae infanzie e va indenant. Ai 6 di Dicembar, vie pe matine, inte sede de Regjon Autonome Friûl-Vignesie Julie di Udin, a son stâts presentâts doi progjets ludic educatîfs indreçâts propit aes frutis e ai fruts. A contâ lis novitâts a son stâts l’assessôr regjonâl aes autonomiis locâls, Pierpaolo Roberti; il president de ARLeF, Eros Cisilino; il diretôr de Agjenzie, William Cisilino; la presidente e codiretore artistiche dal CSS Teatro Stabile di Innovazione del FVG, Rita Maffei; il diretôr de Academie di Bielis Arts di Udin “G.B. Tiepolo”, Fausto Deganutti.
“I Numaruts” e je la version furlane dai “Numberblocks”, un carton animât innomenât produsût de BBC, il servizi public radiotelevisîf dal Ream Unît, che al jude i plui piçui a imparâ lis tabelinis e che al è stât dopleât in lenghe furlane par un totâl di trente episodis. “Sul Troi des Contis – videoflabis furlanis”, invezit, al propon tredis videoflabis origjinâls par furlan, sedi leadis ae tradizion che ineditis. Ducj i doi i prodots a saran zontâts tal palinsest za siôr di rubrichis dal program televisîf “Maman!”, in onde su Telefriuli, in plui che tal sît de ARLeF e tal canâl YouTube istituzionâl de Agjenzie. A son doi progjets dal dut in linie cu lis modalitâts plui atuâls di intratigniment e di aprendiment dai piçui.
“Par tutelâ il patrimoni linguistic che al esist te nestre regjon, che al è un dai pilastris de autonomie dal Friûl-Vignesie Julie, al è fondamentâl partî dai plui piçui. Al è un obietîf che la ARLeF e à centrât ad implen cui siei gnûfs prodots ludics creatîfs in lenghe furlane indreçâts ai fruts, fats in graciis des grandis competencis artistichis e culturâls che o vin sul nestri teritori: ‘I Numaruts’ e ‘Sul Troi des Contis – videoflabis furlanis’. Produzions di nivel cetant alt, cun pussibilitâts di ûs e capacitâts educativis une vore largjis, e no dome sot di un profîl linguistic. E je une azion che si inserìs in maniere perfete intal contest des ativitâts metudis in cjamp de Regjon, midiant de ARLeF, par tutelâ e dâ valôr al patrimoni linguistic, identitari e culturâl peât ae lenghe furlane”, al à declarât l’assessôr regjonâl aes Autonomiis locâls, Pierpaolo Roberti.
“Cun chescj doi gnûfs progjets animâts la ARLeF e vûl implementâ inmò di plui la propueste di intratigniment indreçade ae infanzie. Une sielte precise, che e je la consecuence dai risultâts ecelents di chescj agns di lavôr dedicât aes gnovis gjenerazions. Vuê o presentìn doi progjets complementârs che a àn la stesse finalitât: fevelâ ai fruts in lenghe furlane, dantjur nozions, ma simpri in maniere divertente. Il furlan al devente cussì lenghe veicolâr, sedi par fevelâ di culture e tradizions che di argoments sientifichis e contemporanis tant che la matematiche. Un aspiet impuartant al è che cun chescj doi gnûfs prodots o metarìn a disposizion ancje dai insegnants imprescj digjitâi facii di doprâ, che a rivaran di sigûr a cjapâ la atenzion dai fruts, par vie che, come dit, a son pensâts par un ûs ludic didatic”, al à marcât Eros Cisilino, president de Agjenzie regjonâl pe lenghe furlane.
“La dopleadure di “I Numaruts” e je stade une vore impegnative. O vin scugnût individuâ atôrs e cjantants che a fossin bogns tal stes timp di cjantâ e di recitâ. O vuei ringraciâ dut il cast pal nivel professionâl, pardabon alt, e pe grande disponibilitât e flessibilitât mostradis tal frontâ cheste sfide. Ognidun di lôr si è inventât tancj suns e vôs diferents (o ricuardi che i personaçs a son cent, ma i professioniscj tancj di mancul), simpri cuntune reativitât plui che imediade. Graciis ancje ae ARLeF che nus à dât la pussibilitât di fâ chest salt di cualitât ecezionâl e al tecnic dal sun, Vittorio Vella. Rivâ a realizâ chest prodot che nol è dome par fruts, ma che cu lis sôs musichis maraveosis al cjaparà ancje la atenzion dai grancj, al è stât une vore apassionant”, e à precisât la presidente e codiretore artistiche dal CSS Teatro Stabile di Innovazione del FVG, Rita Maffei.
“O crodìn che la art e sedi un veicul fondamentâl ancje par trasmeti la culture furlane, duncje no podevin che aderî cun entusiasim a cheste iniziative che e à une impuartance straordenarie. Il risultât globâl al è ecelent e o soi sigûr che al varà un grant sucès di public. O vuei evidenziâ ancje l’impegn dai nestris fruts. Fâju partecipâ a chestis iniziativis, che ju metin in contat cul mont dal lavôr, al è une des nestris missions. Viodi che a lavorin cun impegn e dedizion, nus pant che cheste e je la direzion juste par dâ il nestri contribût ae lôr cressite”, al à declarât Fausto Deganutti, diretôr ABA UD – Academie di Bielis Arts G.B. Tiepolo di Udin.
“I Numaruts” – produsût de ARLeF su licence di Videoplugger Ltd – e je la version furlane dai “Numberblocks”, un carton animât de BBC (tal 2017, al è stât nomenât par un premi BAFTA te categorie “Aprendiment”) dulà che i protagoniscj a son regui une vore colorâts e simpatics. Un mût par imparâ la matematiche, in particolâr lis tabelinis, cjantant, zuiant e divertintsi: un supuart didatic pai docents, ma ancje pes fameis. I trente episodis a proponin storiis dulà che i numars a vivin piçulis aventuris o situazions che no son usuâls (un spetacul, un conciert rock, une gare sportive, un viaç tal spazi…).
La musiche e à un rûl fondamentâl inte narazion, tant che i autôrs a àn sielzût di zovâsi des atmosferis di componiments musicâi cognossûts (par esempli i musicals West Side Story, Jesus Christ Superstar, ma ancje rielaborazions des musichis di Tchaikovsky o il sound rock). Inte version furlane la dopleadure e je stade curade dal CSS sot de direzion di Rita Maffei; la traduzion, invezit, e je stade realizade dal Sportel regjonâl pe lenghe furlane. In ducj i doi i câs ai professioniscj ur è stât domandât un impegn notevul par che la version furlane e rifletès la stesse musicalitât dal origjinâl inglês. Lis senegjaturis di fat a son in rime o in rime cjantade e ciertis sfumaduris linguistichis o mûts di dî a son tipics de culture britaniche. Si è cirût duncje di creâ adataments bogns di dâ sens e fluiditât ae version furlane. Ae stesse maniere, la dopleadure e à domandât un sfuarç notevul ai atôrs e ai cjantants, che a son rivâts a consegnâ al public lis personalitâts di ducj i cent personaçs diferents.
Tacant di Zenâr dal 2024 i Numaruts a saran zontâts inte programazion de trasmission televisive Maman!, produsude de ARLeF e di Telefriuli, in plui che tal sît de ARLeF e tal canâl YouTube istituzionâl de Agjenzie.
“Sul Troi des Contis – videoflabis furlanis” al nas di une idee di William Cisilino, cu la direzion artistiche di Marco Maria Tosolini. Lis tredis videoflabis ilustradis a proponin sedi contis de tradizion furlane che contis ineditis, adatadis tal prin câs, scritis in origjinâl tal secont, di Stefania Elia. Par acompagnâ i tescj cu lis imagjins, la Agjenzie si è zovade no dome di ilustradôrs professioniscj (la zovine Elisa Codutti e il pluripremiât Paolo Cossi), ma ancje de Academie di Bielis Arts “G.B. Tiepolo” di Udin cun cualchidun dai arlêfs dai cors di Piture (Sara Martinuzzo, Chiara Montagner e Alberto Morello, coordenâts dal professôr Carlo Alberto Palumbo).
Lis professionalitâts impegnadis inte realizazion des Contis a son tantis, des vôs di Paola Bacchetti e Aida Talliente, che a àn dât vite ae narazion, ae regjie video, realizade di Giorgio Milocco.
Lis videoflabis a saran zontadis te programazion de trasmission tv Maman!, produsude de ARLeF e di Telefriuli. La prime, Blancje come la nêf, e larà in onde propit ai 8 di Dicembar dal 2023. Dutis lis flabis si puedin za cjalâ tal sît e tal canâl YouTube de ARLeF, sedi par furlan che inte version cui sottitui par talian.
