Il Friûl al è une regjon storiche milenarie che il so teritori al cjape dentri lis ex provinciis di Pordenon, Udin e Gurize. Intai notiziaris de sede regjonâl Rai pal Friûl-Vignesie Julie, dut câs, il tiermin al è simpri plui dispès doprât par segnâ la sole ex provincie di Udin.
Lu fâs notâ un grup nudrît di associazions, academics, operadôrs culturâi e citadins furlans che a àn inviât vuê une letare di proteste a Giulio Corso, diretôr de sede regjonâl a Triest. La iniziative e je nassude dopo di un servizi dal Tgr de edizion serâl di martars ai 11 di Avrîl, che inte sô infografiche – difondude une vore in chestis oris intai social media – al doprave il tiermin Friûl par fevelâ di Udin.
“In chescj agns – e osserve Stefania Garlatti-Costa, puartevôs dai firmataris de letare – o vin assistût a une erosion dal concet di Friûl, in diviers ambits de vite sociâl e politiche. L’ûs falât dai tiermins Friûl e furlan di bande de redazion gjornalistiche regjonâl Rai, o imagjinìn dovût a trascurance semplice, che al contribuìs però a chest procès di erosion, al puarte fûr di strade e nol è rivuardôs viers dai citadins furlans residents intes ex provinciis di Gurize e Pordenon, e in gjenerâl al rapresente une imprecision inacetabile di bande dal servizi public”.
I firmataris, che a àn domandât une retifiche publiche e un incuintri di confront cul diretôr Corso, a cjapin dentri tantis associazions ativis inte promozion de lenghe e culture furlane, tra chês la associazion “La Patrie dal Friûl” che al publiche il storic omonim mensîl, la Cooperative Informazion Furlane che e aministre Radio Onde Furlane, la Societât sientifiche e tecnologjiche furlane cul so president Antonino Morassi, e i setemanâi “Il Friûl” e “La Vôs dai Furlans” cul diretôr Rossano Cattivello. (A.D.G.) -13.04.2023
