La stagjon invernâl 2024-25 e je stade fin cumò une vore buine pal pôl schiistic dal Çoncolan, indulà che a àn regjistrât une cressite dal 24% dai schiadôrs a pet dal stes periodi dal an passât, ven a stâi 93.158 turiscj fin ai 12 di Zenâr.
Tal 2025 la Regjon e à metût a disposizion altris 6 milions di euros che si zontin ai 3,5 milions invistûts tal 2024. “Chescj bêçs – al à visât l’assessôr regjonâl al Turisim Sergio Emidio Bini – a àn za permetût di fâ lavôrs impuartants come il parc dai zûcs di Ravasclêt e il miorament des pistis Laugiane e Variante Val di Nuf. Tal prossim an l’intervent plui impuartant al sarà la costruzion dal gnûf bacin Tamai, progjet che al vâl 2,5 milions di euros e che al sarà doprât pe nêf artificiâl. (a.d.g.) – 13.01.2025
